ԿԱՆՈՆԱԳԻՐ

Հայաստանեայց Եկեղեցւոյ Կիրակնօրեայ Դպրոցներու

ԱՆՈՒՆ

Յօդ. Ա.

- Կիլիկիոյ Կաթողիկոսական թեմերուն բոլոր եկեղեցիները կ'ունենան իրենց յարակից կրօնական դպրոցները, որոնք կը կոչուին Հայաստանեայց Եկեղեցւոյ Կիրակնօրեայ Դպրոցներ:

ՆՊԱՏԱԿ

Յօդ. Բ.

ա) Հայաստանեայց Եկեղեցւոյ դաւանութեան եւ աւանդութեան համաձայն կրօնական դաստիարակութիւն տալ մասնաւորապէս մանուկներուն եւ պատանիներուն, իբրեւ լրացուցիչ մասը ազգային ընդհանուր կրթութեան եւ դաստիարակութեան, եւ ընդհանրապէս ալ չափահասներուն աւանդել քրիստոնէութեան եւ Մայրենի Եկեղեցւոյ վերաբերեալ գիտելիքներ եւ ծանօթութիւններ:

բ) Այս դաստիարակութեան նպատակն է Հայ ժողովուրդին զաւակները գիտակից ընել իրենց Քրիստոնէական Կրօնքին եւ Մայրենի Եկեղեցւոյն եւ շինել անոնց քաղաքացիական նկարագիրը:

ՄԻՋՈՑ

Յօդ. Գ. Սոյն նպատակը իրագործելու միջոցներն են.

ա) Կազմակերպել Կիրակնօրեայ Դպրոցներ իւրաքանչիւր թեմի բոլոր եկեղեցիներուն կից:

բ) Չափահասներու համար կազմակերպել լսարաններ՝ շաբթուան յարմար օրերուն մէջ:

գ) Հայթայթել կամ հրատարակել մանուկներու եւ չափահասներու յարմար սուրբգրական դասագիրքեր, կրօնական թերթեր, գիրքեր եւ պատկերներ:

դ) Սարքել կանոնաւոր դասախօսութիւններ՝ պատրաստելու համար կամաւոր ուսուցիչներ Կիրակնօրեայ Դպրոցներու, մշակելով ուսուցչութեան համար անհրաժեշտ նիւթեր: